唐伯虎的名字由生肖而來

来源：m.cdqmw.net作者：cdqmw.net时间:2013-10-12 18:19

唐伯虎——因為有好多粵劇同電影都鍾意用佢作為題材，所以唐伯虎這人物的事蹟，在民間早已廣泛流傳。
當然，唐伯虎最令人津津樂道的，係電影角色裡面，佢有九個老婆。
不過，原來據講唐伯虎實際只有三個老婆，只不過三太係一位姓沈的而俗名「九娘」的女子，而「九娘」這個名字經一傳十、十傳百、百傳千之後，就變成「唐伯虎娶了九個娘子」，所以，唐伯虎有九個老婆的風流韻事，就流傳下來了。
唐伯虎的書畫，好多時都蓋上「江南第一風流才子」的蓋章，所以後來人人都叫佢做「風流才子」或「風流畫家」。
唐伯虎個名，據講亦同佢生肖有關。相傳唐伯虎係「庚寅」年出世，所以佢爸爸幫他改名做「唐寅」。講開又講，「唐」同「庚」兩個字，除下方的「口」字及「八」字有分別外，成個字型都相似，所以唐寅爸爸幫佢改名，亦都真係花費好多心思。
古代文人，多數有一個別字稱號，而唐寅亦係文人，自然要多銜頭稱號先合身份。庚寅的「寅」，於十二地支係屬於「老虎」，即係話，「唐寅」即係「唐虎」，但叫「唐虎」並唔文雅，所以，中間加個「伯」字，就變成「唐伯虎」。
點解「唐寅」要加一個「伯」字，大家都不得而知，不過，我地私下同白鶴鳴師傅閒談間，白師傅話呢個「伯」字，亦大有可能同玄學有關係。
白師傅話，生肖由地支而來，地支的「寅」屬「虎」，而唐寅在庚寅年出生，庚的五行屬金，白色的五行屬金，咁連帶關係之下，就演變成「白虎」。
不過，當時一般人，覺得白虎屬兇猛野獸，亦唔夠文雅。唐寅心想，佢自己係一個「人」，將「人」加在「白」之旁邊，就成為「伯」字，咁樣，「唐伯虎」就變成「唐伯虎」。實情是否當真如此，未有歷史記載，只能當成茶餘飯後的話題就算！